Shkencëtarët zhvillojnë vaksinë universale kundër kancerit që stimulon sistemin imunitar
Shkencëtarët kanë bërë një hap të rëndësishëm në luftën kundër kancerit me zhvillimin e një vaksine universale që mund të synojë një gamë të gjerë tumoresh, duke zgjuar sistemin imunitar për të sulmuar qelizat kancerogjene.
Ekipi i Universitetit të Floridës ka përdorur teknologjinë e mRNA-së për të prodhuar proteina që nxisin një reagim të fuqishëm imunitar. Ky mekanizëm nuk është i kufizuar vetëm në lloje të caktuara tumoresh, por forcon përgjigjen e qelizave imunitare “të fjetura”, duke krijuar një alarm universal kundër kancerit.
Kur vaksina u kombinua me barnat ekzistuese kundër kancerit, të njohura si inhibitorë të pikave kontrolluese imunitare (ICI), rezultatet ishin jashtëzakonisht premtuese. Te minjtë, kombinimi çoi në eliminimin e disa tumoreve, përfshirë ato që zakonisht rezistojnë ndaj trajtimit.
“Ky zbulim tregon potencialin e vaksinave universale për të bërë sistemin imunitar më efektiv kundër tumorit të pacientit,” tha onkologu Elias Sayour.
Ekipi tashmë po punon në formula të reja dhe planifikon prova klinike te njerëzit për të vlerësuar sigurinë dhe efikasitetin e kësaj terapie. Kjo qasje mund të hapë rrugë për trajtime më efektive dhe, ndoshta, për parandalimin e rikthimit të sëmundjes.
Ne pritje të testeve klinike, kjo vaksinë mund të përfaqësojë një revolucion në trajtimin e kancerit dhe një shpresë të re për miliona pacientë në të gjithë botën.
